Граѓаните на Бразил излегоа на протест откако двајца белци, членови на обезбедувањето на еден супермаркет во Порто Алегре, убија црномурест сограѓанин во четвртокот, пренесува Би-Би-Си.
Снимките од инцидентот ги преплавија социјалните мрежи. На нив се гледа како 40-годишниот Жоао Алберто Силвеиру Фреитас добива удари по лицето пред продавница на „Карфур“ во Порто Алегре. Според бразилските медиуми, конфликтот се случил откако Фреитас се скарал со продавач, кој потоа го повикал обезбедувањето.
Демонстрантите вчера влегоа во продавницата во Бразилија, извикувајќи „Црните животи се важни“ и повикаа на бојкот на тој трговски синџир. Во Сао Паоло демонстрантите искршија прозорец, фрлија стока од полиците и запалија оган во продавница на „Карфур“.
Од компанијата изјавија дека жалат поради бруталната смрт на Фреитас и ветија дека ќе го раскинат договорот со обезбедувањето и ќе го отпуштат управителот на продавницата кој бил на должност.
Двајцата мажи кои наводно го претепале Фреитас до смрт се уапсени и се под истрага за убиство. Еден од двајцата уапсени е воен полицаец кој не бил на должност за време на инцидентот.
Бразил има долга историја на ропство и е последната земја што го укина во 1888 година.
