Претседателот на Мексико Андрес Мануел Лопез Обрадор „внимателно“ реагираше на заканата на американскиот претседател Доналд Трамп дека ќе ја затвори границата со Мексико, пренесува МИА.
– Секогаш бараме добар однос со САД. Не сакаме да бидеме непромислени, рече Обрадор.
Претседателот на Мексико не сакаше да ја коментира делумната блокада на американската Влада предизвикана од спорот околу ѕидот на границата.
Тој додаде дека Мексико ќе ги брани мигрантите.
Трамп денеска се закани дека ќе ја затвори границата со Мексико, ако конгресмените демократи не одобрат финансирање на граничниот ѕид.
– Ќе бидам принуден целосно да ја затворам јужната граница ако демократите не ни дадат средства за завршување на ѕидот, напиша Трамп на Твитер и ги повика конгресмените од Демократската партија да „ги смента апсурдните закони за имиграција, кои се претворија во товар за земјата“.
Трамп и минатиот месец се закани дека ќе ја затвори границата со Мексико во рамките на борбата со илегалната имиграција.
Во САД на 22 декември стапи во сила делумна блокада на работата на Владата, по неуспешните преговори на републиканците и демократите и претседателот Доналд Трамп за тоа Конгресот да додели пет милијарди долари за изградба на ѕид на границата со Мексико.
