Германската канцеларка Ангела Меркел беше меѓу последните западни лидери што му честитаа на Володомир Зеленски за неговата убедлива победа во вториот круг од претседателските избори во Украина, пренесува ТАСС.
-Со сето срце Ви го честитам изборот за претседател на Украина- напиша Меркел во својата телеграма до Зеленски.
Таа истакна дека од украинската револуција во 2014 година двете земји ги засилија односите како во политичките така и во економските, културните и јавните сфери.
-Се грижам за стабилизацијата на Украина и за мирно решавање на конфликтот, како и за спроведување на клучните реформи во судските органи, децентрализацијата на власта и во борбата против корупцијата. Германската влада во иднина ќе продолжи активно да ја поддржува Украина особено нејзиното право на суверенитет и територијален интегритет- пишува Меркел посакувајќи му на Зеленски добра среќа и успех на функцијата.
Пред изборите во Украина, на 12 април Меркел се сретна во Берлин само со актуелниот украински претседател Петро Порошенко. Во меѓувреме францускиот претседател, Емануел Макрон, се состана со двајцата кандидати. Некои германски експерти забележаа дека ова е првпат еден германски канцелар да се сретне со еден од претседателските кандидати пред вториот круг од изборите.
Претседателските избори во Украина се одржаа на 21 април. Со пребројани 97,65 отсто од гласовите, шоуменот Владимир Зеленски, кандидат на партијата Слуга на народот, освои убедлива победа со 73,14 отсто. Порошенко, кој владееше со земјата пет години, освои 24,53 отсто од гласовите.
