Кипар и Египет потпишаа договор за изградба на првиот гасовод и транспорт на природен гас од Кипар по дното на Средоземно Море до Египет.
– Потпишувањето претставува пресвртница, не само за Кипар, туку и за целиот источен Медитеран, изјави кипарскиот министер за енергетика Јоргос Лакотрипис за посетата на египетскиот министер за нафта Тарек ел-Мол.
Гасот од наоѓалиштата во крајбрежјето на Кипар ќе се транспортира во Египет, каде ќе се претвори во течен природен гас што ќе се извезува во Европа.
Американската фирма „Нобл енерџи“ во 2011 година откри гас во крајбрежјето на Кипар, а резервите се проценуваат на 127,4 милијарди метри кубни, но комерцијалната експлоатација се уште не е почната.
Конзорциумот, во кој, покрај „Нобл енерџи“, се наоѓаат и фирмите „Дач Шел“ и ДЕЛЕК од Израел, планира пред почетокот на операцијата повторно да преговара со кипарската Влада околу условите на договорот.
Според Лакотрипис, овој договор ќе привлече милијарди долари во изградба на инфраструктура.
