Иранскиот министер за надворешни работи, Џавад Зариф, во вторник ќе одржи разговори со својот индиски колега во главниот град на Индија, откако Њу Делхи престана да купува иранска нафта по обновените санкции на САД.
Индија беше најголем купувач на иранска нафта по Кина, но земјата го прекина увозот откако Вашингтон наметна нови санкции врз Иран, со што на другите земји им беше забрането да увезуваат иранска нафта.
– Индија е еден од нашите најважни партнери, економски, политички и регионален – рече Зариф во понеделникот пред разговорите со министерот за надворешни работи, Сушма Шварај.
Вашингтон сака да го блокира иранскиот извоз на нафта откако американскиот претседател Доналд Трамп се повлече од нуклеарниот договор меѓу Иран и шест светски сили од 2015 година.
– За жал, САД непотребно ја ескалираа ситуацијата. Не бараме ескалација, но ќе се браниме – рече Зариф.
Санкциите го преполовија извозот на нафта од Иран на 1 милион барели дневно од 2,8 милиони барели дневно минатата година. Извозот би можел дополнително да опадне на 500 илјади барели дневно во мај, изјави ирански официјален претставник.
Иран инсистира на извоз на најмалку 1,5 милиони барели нафта како услов за останување во меѓународниот нуклеарен договор, изјавија извори запознаени со разговорите меѓу Иран и ЕУ.
