Германската индустрија од владата во Берлин бара детален план и практични критериуми за безбедно отворање на економијата по повеќемесечна блокада, соопшти здружението БДИ, повикувајќи на европска координација за граничните ограничувања.
– Индустријата моментално закрепнува од корона-кризата, но тоа закрепнување е на стаклените нозе – предупреди БДИ, потсетувајќи на проценките дека економијата најверојатно нема да се врати на нивото на пред-пандемијата до 2022 година.
Предвидливоста и поинтензивната координација на ограничувањата на европско ниво се клучни за успешно ублажување на ефектите од пандемијата, посочуваат тие, додавајќи дека затворањето на границите е „крајно контрапродуктивно за набавка на стоки“.
Германија неодамна ги затвори своите граници со Чешка и австрискиот регион Тирол за да спречи ширење на нови видови на коронавирус. Индустријалците бараат јасна стратегија за среднорочна вакцинација и доволен капацитет за тестирање.
– Треба да се обезбедат можности за практично тестирање низ цела Европа за да се обезбеди непречен проток на стоки – нагласија тие.
Меѓу 20-те барања, тие вклучија силна дигитална инфраструктура и стимулации за инвестиции и побараа од владата да го поддржи предлогот на Европската комисија за продолжување на пофлексибилните регулативи за државна помош до крајот на оваа година.
Најновата рунда мерки за затворање најмногу ги погоди туризмот, малопродажбата и угостителството, но податоците објавени денес од Централното биро за статистика покажуваат дека пандемијата во 2020 година силно ја погодила индустријата.
Бројот на вработени во индустријата падна за првпат во последните десет години. На крајот на 2020 година индустриските претпријатија со над 50 вработени вработија 5,5 милиони работници, што е за 2,2 проценти помалку од претходната година.
