Бунтовниците ги негираат обвинувањата од сириските државни медиуми во врска со извршениот напад со отровен гас во Алепо, во кој повредени се најмалку 100 цивили.
Меѓу повредените има жени и деца, од кои некои се во критична состојба. Нападите биле извршени во трговски квартови во градот.
Командантот на сириските бунтовници Абдел-Салам Абдел-Разак ги отфрли тврдењата дека бил употребен отровен гас, објаснувајќи дека тие не поседуваат такво нешто, ниту имаат можност да го користат при напади.
– Тоа е лага – напиша Абдел-Разак на Твитер откако беа објавени извештаи за нападот на Алепо.
Претходно сириски официјален претставник изјави дека најмалку 50 цивили побарале лекарска помош поради проблеми со дишењето по бунтовничкиот напад.
Локалните медиуми, повикувајќи се на полициски извори, соопштија дека бунтовниците истрелале ракети наполенти со хлор.
Сириските безбедносни сили на овој напад одговориле со ракетирање на бунтовнички позиции.
