Украинскиот претседател Володимир Зеленски изјави дека утре ќе отпатува во Турција за да ги обнови разговорите за ставање крај на војната во Украина, која трае повеќе од три и пол години.
Тој ќе отпатува во Турција по денешната посета на Шпанија.
– Се подготвуваме да ги обновиме преговорите и развивме решенија што ќе им ги понудиме на нашите партнери. За Украина е од огромно значење да се направи сè што е можно за да се стави крај на војната – рече Зеленски за неговите претстојни состаноци во Турција.
Тој додаде дека неговата земја работи и на продолжување на размената на затвореници со Русија.
Кремљ минатиот месец го обвини Киев за нарушување на преговарачкиот процес во Истанбул за можно мирно решавање на конфликтот.
– Процесот е во мирување поради неподготвеноста на режимот во Киев да одговори на каков било начин на прашањата што ги поставивме – изјави тогаш портпаролот на Кремљ, Дмитриј Песков.
Делегации на Москва и Киев се состануваат постојано од мај оваа година на директни разговори во турската метропола Истанбул.
На средбите беа договорени неколку размени на воени заробеници и тела на загинати војници, но Русија одбива да ги повлече своите главни барања, поради што во блиска иднина не е на повидок мировен договор.
