Украинскиот претседател Володимир Зеленски синоќа по серијата руски напади во кои загинаа или се ранети цивили, повторно ги повика сојузниците на Киев да го зголемат притисокот врз Москва.
Во завчерашниот руски ракетен напад врз градот Дњепар загинаа пет лица, меѓу кои и едно дете, а повеќе од 20 беа ранети.
Едно лице загина, а тројца се ранети во руски напад вчера во Костантиновка, во близина на линијата на фронтот во областа Доњецк, соопшти регионалниот гувернер.
Истовремено, во руското гранатирање загинаа две лица на место западно од Херсон, а во Киев во напад со дрон на станбена зграда загина едно девојче.
Во синоќешното видео обраќање Зеленски рече дека овие напади покажуваат дека Русија е „решена да продолжи со агресијата“.
Тој додаде дека тоа се услови во кои недостигот на посилни одлуки од страна на партнерите за поддршка на Украина само го охрабрува рускиот претседател Путин дополнително да инвестира во теророт.
„Светот може да ја запре ескалацијата на војната. Зборовите не се доволни за тоа, потребни се конкретни чекори“, рече Зеленски.
