Рускиот претседател Владимир Путин изјави дека воените цели на неговата земја во Украина се „благородни“ и дека ќе бидат остварени, јави руската државна новинска агенција Тасс, пренесе Си-ен-ен.
Во денешниот говор на космодромот Восточни во источна Русија, каде што се состана со белорускиот лидер Александар Лукашенко, Путин рече дека „специјалната операција“ во Украина е вистинскиот чекор бидејќи Русија „немала друг избор“.
Путин рече дека целта на „специјалната воена операција“ е да им се помогне на жителите на Донбас и „презема мерки за да се обезбеди безбедноста на самата Русија“.
– Очигледно, немавме друг избор, тоа е точно. И нема сомнеж дека целите ќе бидат постигнати – рече Путин во вторникот.
– Главната цел е да им помогнеме на луѓето во Донбас, на народот на Донбас, што го признавме и моравме да го направиме тоа, бидејќи властите во Киев, охрабрени од Западот, одбија да ги спроведат договорите од Минск, насочени кон мирно решавање на проблемите. Проблемите на Донбас – додаде рускиот претседател.
Во врска со влијанието на западните санкции против Москва, Путин рече дека Русија нема да се изолира и е подготвена да соработува со сите партнери кои тоа го сакаат.
– Нема да се изолираме. Во современиот свет, целосно е невозможно некој целосно да се изолира, а невозможно е да се изолира огромна земја како Русија. Така што ќе работиме со оние партнери кои сакаат да комуницираат – рече Путин.
Тој исто така рече дека Русија ќе развива сопствени способности за да го замени она што порано можеше да го купи со приходите од продажба на енергија.
– Ќе ги промовираме сопствените способности, ќе го развиеме она што можевме слободно да го купуваме за петродолари и гас – рече рускиот претседател на состанокот со вработените во космодромот „Восточни“ во Амурската област.
