Напад со руски беспилотни летала во текот на ноќта оштети украинска електрана во близина на Одеса, на југот од Украина, оставајќи утринава повеќе од 29.000 корисници без струја.
Русија, од друга страна, утринава соопшти дека соборила 21 украински дрон над својата територија.
Во текот на ноќта 11 дронови беа соборени над регионот Волгоград во јужна Русија, додека останатите беа уништени над регионите Ростов, Белгород и Брјанск во југозападна Русија, објави руското Министерство за одбрана утринава на апликацијата за пораки Телеграм.
Гувернерот на регионот Голема Одеса, Олех Кипер, на Телеграм објави дека најтешко е погоден градот Чорноморск, веднаш до Одеса, каде во нападот биле оштетени станбени куќи и административни згради.
– Клучната инфраструктура работи на генератори -, рече Кипер, додавајќи дека во нападот е повредено едно лице.
Засега нема коментар од Русија, која континуирано ја напаѓа клучната инфраструктура на Украина за време на 42-месечната војна што Москва ја започна со инвазијата врз Украина на 24 февруари 2022 година.
