Министерот за надворешни работи на Унгарија, Петер Сијарто, денеска изјави дека неговата земја нема да купува поскапа нафта по диктат на Украина, дека ќе ги брани пониските цени на енергенсите и ќе го чува суверенитетот, и покрај притисоците на претседателот на Украина, Володимир Зеленски.
– Литванскиот министер за надворешни работи, Будрис Кестутис, денеска изјави дека би му било срам да живее во земја која купува евтина руска нафта, тврдејќи дека тоа значи откажување од автономијата – напиша Сијарто на Х.
Како што истакна тој, балтичките држави долго време „играат како што свири Зеленски“, но Унгарија нема да подлегне на уцените на украинскиот претседател.
– Никој не може да ни диктира од каде треба или не треба да купуваме нафта, и никој не може да нè натера да ја купуваме по повисока цена од претходно – рече Сијарто.
Тој нагласи дека семејствата во многу европски земји плаќаат три до четири пати повеќе за комуналии отколку унгарските.
– Ние ќе ги заштитиме пониските цени на енергенсите и ќе го браниме нашиот суверенитет – порача Сијарто.
Нафтата од Русија престана да тече низ нафтоводот „Дружба“ кон Унгарија и Словачка на 27 јануари, а Украина тврди дека причината е руски напад врз нафтената инфраструктура во градот Броди во регионот Лавов. Унгарскиот премиер Виктор Орбан и словачкиот премиер Роберт Фицо се сомневаат дека Киев ја користи ситуацијата за политички притисок и мешање во унгарската изборна кампања. Украина ги отфрла обвинувањата и тврди дека работи на санација на оштетената инфраструктура.
