Три палестински групи за човекови права поднесоа жалба до Меѓународниот кривичен суд (МКС), повикувајќи го телото да го испита Израел за „апартхејд“ како и „геноцид“ и да издаде налози за апсење на израелските лидери.
Во тужбата, поднесена денеска од организациите за човекови права „Ал-Хак“, „Ал Мезан„ и „Палестинскиот центар за човекови права“, се повикува на „итно внимание на континуираниот налет на израелски воздушни напади врз густо населените цивилни области во Појасот Газа“, при што загинаа повеќе од 10.500 Палестинци, од кои речиси половина се деца, според здравствените власти во Газа.
Документот, исто така, бара од телото да ја прошири својата тековна истрага за воени злосторства со разгледување на „задушувачката опсада наметната на Газа, принудното раселување на нејзиното население, употребата на отровен гас и негирањето на неопходните работи како храна, вода, гориво и електрична енергија. .
Тие дела претставуваат „воени злосторства“ и „злосторства против човештвото“, вклучително и „геноцид“, се вели во обвинението.
Трите групи бараат налози за апсење на израелскиот претседател Исак Херцог, премиерот Бенјамин Нетанјаху и министерот за одбрана Јоав Галант.
Обвинителството на МКС отвори формална истрага за ситуацијата во Палестина во 2021 година, откако утврди дека „воени злосторства биле извршени од палестински и израелски војници на Западниот Брег, вклучувајќи го и Источен Ерусалим и Појасот Газа“.
Во последното барање до МКС, адвокатот на групата за човекови права, Емануел Дауд, се осврна на обвинението на МКС против рускиот претседател Владимир Путин за воени злосторства во Украина и рече дека „нема место за двојни стандарди во меѓународната правда.
– Без разлика дали воените злосторства се извршени во Украина или Палестина, сторителите треба да одговараат – рече Дауд.
Ова не е првпат случајот против Израел да биде поднесен пред МКС за време на неговата едномесечна војна во Газа.
На 31 октомври, „Репортери без граници“ (РСФ) поднесе жалба до телото во која се тврди дека Израел извршил воени злосторства против новинарите во Газа.
Според податоците на Комитетот за заштита на новинарите (CPJ) од 7 октомври досега се убиени најмалку 39 новинари во израелските напади, од кои 34 биле Палестинци, четворица Израелци и еден Либанец.
