Американскиот претседател Доналд Трамп го поздрави одобрувањето на резолуцијата подготвена од САД во Советот за безбедност на ОН, со која се поддржува неговиот мировен план за Газа, оценувајќи го како историски пробив.
– Ова ќе влезе во историјата како едно од најголемите одобрувања во Историјата на Обединетите нации, ќе доведе до понатамошен мир низ целиот свет и е момент од вистински историски размери – напиша Трамп на Трут Соушл.
Советот ја усвои резолуцијата доцна синоќа, при што 13 членки гласаа за, а Русија и Кина беа воздржани. Мерката поддржува план на САД кој вклучува распоредување на меѓународна сила за да помогне во стабилизирање на прекинот на огнот меѓу Израел и палестинската милитантна група Хамас.
Трамп ги пофали оние кои го поддржаа предлогот, но не упати никаква референца за Израел, Хамас или Палестинците во неговата изјава.
Резолуцијата го поддржува планот од 20 точки што Трамп го објави кон крајот на септември. Тој предвидува Газа привремено да ја администрира комитет од непартиски палестински технократи и меѓународни специјалисти, надгледуван од ново преодно тело познато како Одбор за мир, со кое, според објавата наТрамп, тој лично ќе претседава.
Се очекува да бидат најавени и дополнителни членови, вклучувајќи го и поранешниот британски премиер Тони Блер.
