Цената на нафтата остро падна откако американскиот претседател Доналд Трамп изјави дека војната во Иран ќе заврши „многу наскоро“, пренесе „Би-би-си“.
Трамп ги предупреди иранските власти да не го блокираат Ормускиот Теснец, клучен воден пат за глобалното снабдување со енергија.
-Ако Иран направи нешто што ќе го запре протокот на нафта во теснецот, САД ќе одговори многу поинтензивно отколку досега – објави тој на социјалните мрежи.
Во доцното претпладневно тргување во Азија, цената на нафтата од типот „брент“ падна за 6,5% на 92,46 долари за барел, додека „Nymex Light Sweet“ се движеше на 88,15 долари, што претставува пад од 7%. Минатата недела, цената на нафтата достигна речиси 120 долари за барел поради загриженоста дека воздушните напади на САД и Израел врз Иран ќе предизвикаат долготрајни прекини во снабдувањето.
Алберто Белорин од „InterCapital Energy“ истакна дека падот на цените донесе привремен олеснувачки момент за трговците, но дека енергетските пазари остануваат нестабилни.
-Цените веројатно ќе реагираат на секоја ескалација или намалување на конфликтот – рече тој.
Берзите во Азија забележаа раст, со пораст на Nikkei 225 за 2,7%, Hang Seng за 2%, а јужнокорејскиот Kospi се зголеми за 5,5%, откако инвеститорите ја ублажија загриженоста за економските ефекти од конфликтот.
Стратешката важност на Ормускиот Теснец останува клучна, бидејќи околу една петтина од светската нафта поминува низ овој тесен воден пат. Експертите предупредуваат дека цените ќе останат нестабилни додека компаниите ја вклучуваат премијата за ризик од можни прекини во снабдувањето.
На глобално ниво, земјите од Г7 се подготвени да преземат мерки за стабилизирање на снабдувањето со енергија, а британската министерка за финансии Рејчел Ривс повика на итна деескалација и безбедност на бродовите во регионот.
