Американскиот претседател Доналд Трамп побара од Конгресот 152 милиони долари за повторно отворање на озлогласениот затвор Алкатраз, како дел од новиот предлог-буџет за фискалната 2027 година.
Предлогот, објавен од Белата куќа, предвидува средствата да бидат наменети за обнова на Алкатраз во „најсовремен безбеден затворски објект“. Овие пари би ја покриле првата година од проектот, кој е дел од пошироко барање од 1,7 милијарди долари за подобрување на, како што се наведува, „распаѓачки притворски објекти“ низ САД.
Уште во мај, Доналд Трамп соопшти дека им дал насоки на надлежните институции да започнат со активности за обнова и повторно отворање на затворот.
Алкатраз се наоѓа на остров во заливот на Сан Франциско и важел за еден од најбезбедните затвори со максимална безбедност. Во период од 1934 до 1963 година служел како место за притвор на најопасните криминалци во САД.
Меѓу најпознатите затвореници биле Ал Капоне, Џорџ Кели Барнс, Алвин Карпис и Роберт Страуд. Вкупно 1.576 лица биле затворени во Алкатраз во текот на неговото функционирање.
По неговото затворање во 1963 година, Алкатраз денес функционира како музеј и национално историско обележје, а воедно претставува и заштитено подрачје за размножување на птици. Островот годишно го посетуваат околу 1,2 милиони туристи.
