Кинеските власти соопштија дека во земјотресот што денеска го погоди Тибет загинале најмалку 53 луѓе а многумина се водат како заглавени под урнатините.
Официјалната новинска агенција Ксинхуа соопшти дека уште 62 лица се повредени во земјотресот во вторникот, цитирајќи го регионалниот штаб за помош при катастрофи, додека десетици последователни потреси го потресоа регионот во западна Кина и соседен Непал.
Околу 1.500 пожарникари и спасувачи беа ангажирани во потрагата по луѓето во урнатините, соопшти кинеското Министерство за вонредни состојби.
Земјотресот се случил утрово во 09:05 часот по локално време (01:05 часот по Гринич) на длабочина од 10 километри, според Кинескиот мрежен центар за земјотреси, кој регистрирал магнитуда од 6,8 степени. Американскиот геолошки институт соопшти дека земјотресот бил со јачина од 7,1 степени. Земјотрес со јачина од 6,8 степени се смета за силен и може да предизвика сериозни штети. Регистрирани се неколку последователни потреси, а најголемиот беше со јачина од 4,4 степени.
Новинската агенција Ројтерс пишува дека урнати излози се гледаат на видео на кое се прикажани последиците од земјотресот во Латсе, кој се наоѓа на околу 150 километри источно од градот Шигатсе. Шигатсе е еден од најсветите градови во Тибет и седиште на Панчен Лама, една од најважните фигури во тибетскиот будизам, чиј духовен авторитет е само втор по Далај Лама.
