Нема победник во тарифната војна, а одењето против светот само ќе резултира со самоизолација, изјави кинескиот претседател Си Џинпинг на состанокот со шпанскиот премиер Педро Санчез денеска во Пекинг.
Си рече дека во текот на изминатите 70 години и повеќе, Кина постигнала развој преку самодоверба и макотрпна борба, никогаш не потпирајќи се на милоста на другите, а уште помалку стравувајќи од какво било неразумно потиснување.
Тој додаде дека без разлика на тоа како се менува надворешниот свет, Кина ќе остане самоуверена и фокусирана на тоа добро да ги води сопствените работи.
Истакнувајќи дека и Кина и Европската унија (ЕУ) се големи економии во светот и цврсти поддржувачи на економската глобализација и слободната трговија, Си рече дека двете страни формирале блиски односи на економска симбиоза со нивното комбинирано економско производство кое, надминува една третина од вкупниот светски, пренесува Синхуа.
Тој повика Кина и ЕУ да ги исполнат своите меѓународни одговорности, да работат заедно за да ја заштитат економската глобализација и меѓународната трговска средина и заеднички да се спротивстават на еднострано малтретирање.
-Ова не само што ги заштитува легитимните права и интереси на Кина и ЕУ, туку служи и за одржување на правичноста и правдата во меѓународната заедница, истовремено почитувајќи ги меѓународните правила и ред – рече Си.
Санчез рече дека Кина е важен партнер на ЕУ, а Шпанија секогаш го поддржувала стабилниот развој на односите меѓу ЕУ и Кина.
Истакнувајќи дека ЕУ е посветена на отворена и слободна трговија, го поддржува мултилатерализмот и се противи на едностраните зголемувања на царините, Санчез рече дека нема победник во трговската војна.
-Соочувајќи се со сложената и предизвикувачка меѓународна ситуација, Шпанија и ЕУ се подготвени да ја зајакнат комуникацијата и координацијата со Кина за да го одржат меѓународниот трговски поредок, да се справат со предизвиците вклучувајќи ги климатските промени и сиромаштијата и да ги заштитат заедничките интереси на меѓународната заедница – рече тој.
