Кинескиот претседател Си Џинпинг денеска ги поздрави учесниците на самитот на Шангајската организација за соработка (ШОС), што се одржува во кинескиот град Тјенџин – пренесоа кинеските медиуми.
Тој изјави дека Шангајската организација за соработка презема сè поголема одговорност за зачувување на регионалниот мир и стабилност, како и за поттикнување на развојот на бројни, различни земји во свет на сè поголема неизвесност и забрзани промени – пренесе агенцијата „Синхуа“.
Си го кажа ова на приемот организиран за пречек на учесниците од целиот свет кои дојдоа во Тјенџин за да присуствуваат на Самитот на Шангајската организација за соработка.
Си изрази уверување дека со заеднички напори на сите страни самитот ќе биде целосен успех и оти Шангајската организација за соработка сигурно ќе одигра уште поголема улога и ќе постигне поголем напредок.
Претседателот на Кина рече дека самитот дава значаен придонес за зајакнување на единството и соработката меѓу земјите-членки, за собирање на силите на Глобалниот Југ и за поттикнување на понатамошниот напредок на човечката цивилизација.
