„Ројтерс“ објави дека Русија спроведе обемни тестови на нови ласерски системи за одбрана од беспилотни летала.
Во соопштението на руската влада, новата технологија е опишана како „ветувачка“ и се додава дека е тестирана против различни видови дронови во различни временски услови.
Се вели дека ласерите против дронови ќе станат дел од „универзален систем за воздушна одбрана“ што рускиот претседател Владимир Путин изјави дека оваа недела Русија треба да го изгради.
– Резултатите од тестот ќе се користат за подобрување на постојните модели и создавање системи способни да обезбедат сигурна заштита од модерно оружје за воздушен напад. Спроведувањето на тестовите ни овозможува да преминеме на сериско производство и да го зголемиме обемот – се вели во соопштението, објави „Ројтерс“, додавајќи дека приложеното видео ги прикажува изгорените остатоци од уништен дрон.
Двете страни во војната меѓу Русија и Украина распоредија дронови во голем број, користејќи ги за да забележат и погодат цели не само на бојното поле, туку и далеку надвор од фронтовските линии.
Украинските беспилотни летала често напаѓаат локации длабоко во Русија, како што се нафтени депоа, рафинерии и аеродроми, што ја нагласува потребата Москва да ја зајакне својата одбрана, пишува британската агенција.
Порано овој месец, украинските беспилотни летала шверцувани во камиони во близина на воздухопловните бази предизвикаа сериозна штета на руската флота бомбардери со долг дострел.
