Денес, рускиот парламент го заврши гласањето за законот со кој Москва се повлекува од ратификацијата на глобалниот договор за забрана на тестирање на нуклеарно оружје.
Горниот дом, Советот на Федерацијата, го одобри законот едногласно со 156 гласа, откако едногласно го усвои и Долниот дом, Думата.
Сега законот оди кај претседателот на Русија Владимир Путин за да биде потпишан – пренесува „Хина“.
Претходно овој месец, Путин ги повика пратениците да ја воведат промената за да ја „рефлектира“ позицијата на Соединетите држави, кои го потпишаа, но никогаш не го ратификуваа Договорот за сеопфатна забрана на нуклеарни тестови (CTBT).
Русија вели дека нема да продолжи со нуклеарно тестирање доколку не го стори тоа Вашингтон, но експертите за контрола на оружјето се загрижени дека тоа би можело да донесе одреден пристап до тест што Западот би го видел како заканувачка ескалација во контекст на војната во Украина.
Украина ја обвини Русија за зголемена „нуклеарна уцена“.
Иако никогаш формално не стапи во сила, CTBT го направи табу нуклеарното тестирање – ниту една друга земја освен Северна Кореја не извршила тест што вклучува нуклеарна експлозија овој век.
Експертите за контрола на оружјето велат дека руски или американски тест може да предизвика нова трка во вооружување во време на акутна меѓународна тензија, со војни кои беснеат во Украина и на Блискиот Исток.
Тие велат дека ако една земја изврши нуклеарна проба, друга веројатно би го направила истото, а други како Кина, Индија и Пакистан би можеле да следат.
„Си-ен-ен“ минатиот месец објави сателитски снимки кои покажуваат дека Русија, САД и Кина изградиле нови капацитети на нивните полигони за нуклеарни тестирања во последниве години.
Американското Министерство за енергетика минатата недела соопшти дека извршило хемиска експлозија на полигонот за нуклеарни тестирања во Невада „за да ја подобри способноста на САД да детектира нуклеарни експлозии со мала моќност низ светот“.
Говорејќи пред руските пратеници пред гласањето во среда, заменик-министерот за надворешни работи Сергеј Рјабков рече дека експлозијата во Невада „несомнено е политички сигнал“.
– Како што рече нашиот претседател, мора да бидеме будни. Ако САД се придвижат кон почетокот на нуклеарните тестирања, ќе мора да одговориме овде на ист начин – рече тој.
