По седницата на Советот за безбедност на ОН одржана синоќа, по повод шест месеци од почетокот на војната во Украина и Денот на независноста на таа земја, 58 земји усвоија заедничка изјава во која бараат итен прекин на воените дејствија.
Текстот на документот во седиштето на ОН во Њујорк го прочита постојаниот претставник на Украина во ОН Серхиј Кислица.
Генералниот секретар на ОН, Антонио Гутереш предупреди за време на седницата на Советот за безбедност дека е „прогласена тревога“ и повтори дека е многу загрижен за воените активности во областа на нуклеарната централа „Запорожје“ на југот на Украина.
– Секоја дополнителна ескалација може да доведе до самоуништување. Неопходно е да се обезбеди електрана што треба да се организира како цивилна инфраструктура – рече Гутереш.
Зборувајќи за влијанието врз цените на храната и горивото, тој изјави дека последиците од „бесмислената војна“ се чувствуваат многу подалеку од Украина.
– Ако не го стабилизираме пазарот на ѓубрива во 2022 година, едноставно нема да има доволно храна во 2023 година – предупреди генералниот секретар.
Украинскиот претседател Владимир Зеленски во обраќањето преку видеоврска ги информираше учесниците на седницата за ракетниот напад на Русија врз железничката станица во областа Днепропетровск во Украина. Тој ги повика сојузниците на Украина да „помогнат да се стави крај на руската агресија“, нагласувајќи дека Русија треба да одговара за своите постапки и страдањата што ги предизвикала.
Рускиот амбасадор во ОН Василиј Небензња се спротивстави на обраќањето на украинскиот претседател Зеленски.
Зеленски синоќа кажа дека најмалку 22 лица загинаа, а десетици се повредени во руски ракетен напад врз железничката станица во градот Чаплине, централна Украина.
