Пет земји од ЕУ, Романија, Полска, Унгарија, Словачка и Бугарија изразија противење на предлогот за ревидиран трговски договор меѓу Европската Унија и Украина, поради стравувања дека новите услови би можеле да доведат до дестабилизација на земјоделските пазари во ЕУ.
Прашањето било покренато на вчерашниот состанок на министрите за земјоделство на ЕУ, според дипломатски извори на кои се повикува Европска Правда.
Новиот договор треба да го замени досегашниот безвизен трговски режим со Украина, кој истече на почетокот на јуни. Тој се заснова на договорот за Длабока и сеопфатна зона на слободна трговија (DCFTA) од 2016 година.
Ревидираната верзија на договорот следи по истекувањето на Автономните трговски мерки (АТМ), со кои Украина имаше повластен пристап до пазарот на ЕУ од почетокот на руската инвазија во 2022 година.
– Петте земји – Полска, Словачка, Унгарија, Бугарија и Романија – го отворија прашањето за новите трговски услови со Украина. Според нив, предложените измени во DCFTA би можеле сериозно да го дестабилизираат европскиот пазар, изјавил дипломатски извор.
Еврокомесарот за земјоделство Кристоф Хансен потврди дека темата била дискутирана на состанокот во Брисел, по барање на група земји-членки.
– Имавме отворена дискусија за ажурираниот договор со Украина, изјави Хансен. – Ги презентирав фактите поврзани со договорот и подвлеков дека тој е во најдобар интерес на нашите земјоделци.
Хансен додаде дека ревизијата на договорот од 2016 година требало да се случи уште во 2021 година, но била одложена поради руската целосна инвазија на Украина.
Иако Европската комисија веќе ги заврши преговорите со Киев на 30 јуни, споменатите пет земји продолжуваат да бараат измени во предложените одредби.
Нивната главна загриженост е дека поевтините украински земјоделски производи би можеле да навлезат на пазарот на ЕУ, што, според нив, ќе им наштети на домашните производители.
