Германија
На Германија ќе ѝ бидат потребни дури 260.000 активни војници за да ги задоволи растечките одбранбени барања на НАТО, предупреди шефот на воениот синдикат на земјата, што е нагло зголемување во однос на официјалната цел на владата од 203.000. Оваа цел првпат беше поставена во 2016 година, години пред почетокот на војната во Украина и пренасочувањето на НАТО кон одбранбените капацитети. Оттогаш, Бундесверот се стреми кон раст. Моментално има околу 181.500 војници.
– Бројката од 203.000 е застарена и повеќе не е реална – рече Андре Вистнер, претседател на здружението „Бундесвер“, влијателна група од интерес, која се залага за подобра опрема, персонал и услови за работа во германските вооружени сили.
– Претпоставувам дека, во зависност од тоа што ќе се одлучи на самитот на НАТО, ќе ни бидат потребни дополнителни 40.000-60.000 војници. Ова значи дека активните сили постепено треба да пораснат до 260.000 војници – рече Вистнер во интервју за германската медиумска група РНД.
Барањата на НАТО
Лидерите на НАТО треба да се состанат на самит во Хаг на 24 и 25 јуни, каде што ќе разговараат за зголемување на целта на алијансата за трошоци за одбрана. „Блумберг“ напиша кон средината на минатата недела дека НАТО ќе побара од Германија уште седум бригади, или околу 40.000 војници, за заедничка одбрана.
Предупредувањето на Вистнер доаѓа токму во време кога германската влада планира нова програма за доброволна воена служба – дел од нејзините напори за решавање на хроничниот недостиг од персонал во Бундесверот. Една идеја е да се регрутираат странски државјани.
Програмата ќе побара од сите 18-годишни мажи да пополнат прашалник, со кој ќе се проценат нивната подготвеност и соодветност за служба. Жените можат да учествуваат доброволно. Целта е да се регрутираат околу 5.000 волонтери годишно. Германскиот министер за одбрана Борис Писториус нагласи дека програмата е „првично доброволна“, но остави отворена врата за преземање подрастични чекори.
– Го кажувам ова сосема намерно и искрено: акцентот е ставен и на „првично“, во случај да не можеме да регрутираме доволно волонтери. Сè уште имаме премалку луѓе за она што нашите вооружени сили треба да го постигнат – им рече тој на пратениците во Бундестагот претходно минатиот месец.
Германија ја суспендираше воената обврска во 2011 година. Враќањето на воената обврска би означило значајна политичка промена. Р.С.
