Рускиот претседател Владимир Путин потпиша декрети со кои се ограничува извозот на готовина и злато, како дел од мерките за сузбивање на сивата економија и спречување на одлив на капитал од Русија.
Според новите правила, преносот на рубљи кон земјите од Евроазиската економска унија ќе биде ограничен на износ до 100.000 долари во денарска противвредност, пресметано според курсот на Централната банка, со примена од 1 април и со одредени исклучоци.
Дополнително, од 1 мај се забранува извозот на златни плочки потешки од 100 грама, мерка што не се однесува на комерцијалните банки, но ќе важи за физички и правни лица.
Властите посочуваат дека овие чекори се реакција на зголемената употреба на готовина и злато во нелегални трансакции. Според податоците, само во јануари годинава од банкарскиот систем биле повлечени околу 13,2 милијарди долари, што се поврзува со префрлање на дел од економските активности во сивата зона.
Заменик-министерот за финансии, Алексеј Мојсеев, изјави дека златото сè почесто се користи како алтернатива на странска валута во незаконски активности, што дополнително го поттикнува одливот на капитал.
И покрај ограничувањата, предвидени се исклучоци за извоз преку одредени меѓународни аеродроми, како и за специфични категории извозници, под услов да поседуваат соодветна документација и дозволи.
