Рускиот претседател Владимир Путин денеска го пречека својот белоруски колега Александар Лукашенко во Москва, каде што двајцата лидери потпишаа документи, вклучувајќи договор за безбедносни гаранции меѓу нивните земји. По потпишувањето, тие се ракуваа и позираа за фотографии, разменувајќи папки со официјалните документи.
Путин ја започна заедничката прес-конференција со добредојде за Лукашенко, нагласувајќи дека Русија и Белорусија се „големи пријатели“, пренесува Скај Њуз.
Во контекст на средбата, Путин истакна дека разговарале за безбедноста, одбраната и регионалните прашања. Тој особено ја нагласи „тешката ситуација во светот, во Европа и на границите на нашите држави“.
Притоа, рускиот претседател посочи дека со Лукашенко дискутирале за создавање заеднички одбранбен простор, при што потврди дека руска воена техника е распоредена во Белорусија.
– Имаме тактичко нуклеарно оружје и одбранбени системи кои ја штитат безбедноста и западната граница на нашите држави, изјави Путин.
Тој додаде дека двајцата лидери размениле официјални документи за ратификација на билатералниот договор за безбедносни гаранции.
– На овој начин, законот стапува во сила, нагласи рускиот претседател.
Белорускиот претседател Александар Лукашенко изјави дека со Путин разговарале и за војната во Украина и најави дека оваа тема ќе биде во фокусот на нивните дискусии и утре.
Тој истакна дека е неопходно „луѓето да им веруваат на фактите“, без да даде дополнителни детали. – Тоа е најважното. Сите овие изјави и ветувања се само празни зборови, додаде тој.
Лукашенко, исто така ги осуди „нелегитимните санкции“ кои Западот ги воведе против Русија и Белорусија. – Убедени сме дека ќе успееме да го надминеме овој притисок, порача белорускиот лидер.
Заедничка изјава за НАТО и ЕУ
Додека Путин и Лукашенко зборуваа на прес-конференцијата, беше објавена и заедничка изјава од нивните разговори.
Во неа, Русија и Белорусија ги оценија постапките на НАТО во контекст на војната во Украина како непријателски и дестабилизирачки, со можност за предизвикување нуклеарен конфликт.
Двајцата лидери исто така ја осудија политиката на Европската Унија кон нивните земји, опишувајќи ја како „агресивна и конфронтирачка“.
Во изјавата се нагласува и дека Русија и Белорусија се подготвени да преземат воени и дипломатски мерки како одговор на активностите на НАТО.
