Кејт Мидлтон, принцезата од Велс, откри дека ѝ е дијагностициран рак и дека е на превентивна хемотерапија.
Во лична порака, 42-годишната принцеза рече дека планираната абдоминална операција во јануари била успешна и оти првично се сметало дека нејзината состојба не е канцерогена.
Но, тестовите по операцијата покажаа дека е присутен рак, рече таа.
– Ова, се разбира, дојде како огромен шок, а Вилијам и јас правиме сè што можеме за да го процесираме и да се справиме со ова приватно, за доброто на нашето младо семејство – додаде принцезата од Велс.
Мајката на Џорџ, Шарлот и Луис рече дека лекарите ја советувале да оди на превентивна хемотерапија и таа моментално е во раните фази на тој третман.
– Ми требаше време да закрепнам од големата операција за да почнам со моето лекување. Но, што е најважно, ни требаше време да им објасниме сè на Џорџ, Шарлот и Луис, на начин што е соодветен за нив и да ги увериме дека ќе бидам добро. Како што им реков, јас сум добро и станувам се посилна секој ден, со тоа што се фокусирам на работите што ќе ми помогнат да заздравам, во мојот ум, тело и дух – рече таа.
Кејт Мидлтон нагласи дека „голем извор на утеха и поддршка“ претставува присуството на нејзиниот сопруг принцот Вилијам покрај неа.
– Како што е љубовта, поддршката и љубезноста што ја покажаа многумина од вас – тоа ни значи многу на двајцата – рече принцезата од Велс.
Кејт Мидлтон не е видена на официјални ангажмани од крајот на декември, кога беше сликана на божиќна прошетка со другите членови на кралското семејство во Сандрингем, Норфолк.
