Украина планира да го зголеми увозот на природен гас за околу 30 проценти поради руските воздушни напади врз нејзината гасна инфраструктура, соопшти министерката за енергетика Светлана Гринчук.
Гринчук на брифинг во Киев изјави дека разговарала со земјите од Г7 за можноста за дополнителен увоз на гас.
Таа посочи дека воздушните напади предизвикале „значителни“ штети врз производствените капацитети на Украина, но одби да открие детали.
Според неа, цел на нападите била регионалната гасна инфраструктура, како и постројки за пренос на електрична енергија во области блиску до фронтот. Гринчук додаде дека земјата размислува и за зголемување на увозот на втечнет природен гас.
