Египетско-британскиот политички затвореник Ала Абдел Фатах го прекинал штрајкот со глад, а одлуката ја објави во писмото што денеска го испрати до неговото семејство, кое се надева дека ќе го види в четврток, откако еден месец не можеше да го посети.
Сестрата на продемократскиот блогер, симболот на Арапската пролет и противник на режимот на Абдел Фатах ал-Сиси, Мона Сеиф денеска на Интернет го објави краткото писмо што и било доставено на нивната мајка.
Во писмото од 14 ноември Ала Абдел Фатах, кој на 18 ноември, в четврток, ќе го прослави својот 41 роденден, напишал: „Го прекинав штрајкот со глад и сакам да го прославам мојот роденден со вас в четврток, донесете торта “.
Тој во писмото не навел зошто почнал да јаде, туку само напишал: „Ќе се видиме во гостинската соба и ќе ви кажам сѐ“.
– Нема да се смирам сѐ додека мајка ми и сестра ми в четврток не го видат Ала со свои очи – напиша Мона Сеиф на Твитер.
По најавата за прекин на штрајкот, адвокатот на затвореникот Тарек Ел-Авади, член на египетската комисија за помилување на претседателот, изјави дека „се надева дека државата брзо ќе донесе мерки за помилување на Абдел Фатах и неколку други осуденици.”
