Израелската армија (ИДФ) соопшти дека Иран истрелал најмалку 10 ракети врз северниот дел на земјата. Сирените за предупредување од воздушен напад се огласија во Хаифа и северен Израел.
ИДФ наведе дека е детектирано дека Иран истрелал балистички ракети. Засега нема информации за евентуални жртви.
Овој напад следува по израелското ракетирање на Иран денеска наутро, само неколку часа откако американскиот претседател Доналд Трамп изјави дека „не бара“ да се вклучи во борбата, но ќе дејствува доколку е потребно за да го спречи Иран да се здобие со нуклеарно оружје.
Израелските власти велат дека 24 лица во Израел се убиени во одмазднички воздушни напади што ги започна Иран. Новинската агенција за активисти за човекови права (HRANA), невладина организација на ирански активисти со седиште во САД, на 19 јуни објави дека 263 цивили, 154 припадници на безбедносните сили и 224 неодредени лица загинале во израелските воздушни напади. Повеќе од 1300 биле повредени. Бројките се базираат, како што се вели, на официјални податоци и локални извештаи.
