Претседателката на Претставничкиот дом на американскиот Конгрес, Ненси Пелоси денеска во тајванскиот Парламент изјави дека оваа островска држава е „едно од најслободните општества во светот“. Пелоси ја пофали претседателката Цаи Инг-вен и повика на зајакната меѓупарламентарна соработка. Таа таму пристигна доцна синоќа на ненајавено, но внимателно следено патување, велејќи како тоа ја покажува непоколебливата посветеност на САД за самоуправниот остров, за кој Пекинг тврди оти е дел од Кина.
Според Пелоси, сега повеќе од кога и да е, американската солидарност со Тајван е клучна. Како што таа додаде, американската одлучност да ја зачува демократијата во Тајван и во остатокот од светот и понатаму е цврста. Таа истакна дека новиот американски закон, насочен кон зајакнување на американската индустрија за чипови во конкуренција со Кина, „нуди поголеми можности за економска соработка на САД и Тајван“.
Пелоси не е првата претседателка на американскиот Претставнички дом, која допатувала на Тајван, Њут Гингрич го посети во 1997 година. Посетата на Пелоси е во момент кога односите меѓу Пекинг и Вашингтон нагло се влошија, во период кога Кинга е помоќна економска, воена и геополитичка сила, отколку што беше четвртина век порано.
Кина го гледа Тајван како дел од својата територија и никогаш не се откажа од употреба на сила, настојувајќи да го стави под своја контрола. САД ја предупредија Кина да не ја користи оваа посета како изговор за воена акција против Тајван.
Американската посета на Тајван на највисоко ниво во изминатите 25 години, Кина ја осуди како закана за мирот и стабилноста во Тајванскиот Теснец. Земјата одговори со низа воени вежби, со повик за разговор на американскиот амбасадор во Пекинг и со најава за прекин на увозот на неколку земјоделски производи од Тајван.
Тајванското Министерство за одбрана денеска соопшти дека Тајван го зголеми нивото на подготвеност и ќе реагира на време и соодветно на кинеските воени вежби со боева муниција кои се спроведуваат околу островот.
Долгогодишната критичарка на Кина, особено кога станува збор за човековите права, Пелоси денеска треба да се сретне и со поранешен активист на плоштадот Тјенанмен, книжар од Хонгконг кој беше уапсен од Кина и тајвански активист од неодамна ослободен.
Лавров: Посетата на Пелоси на Тајван е обид на САД да ја докажат својата неказнивост
Посета на Ненси Пелоси на Тајван е уште еден показател за непочитувањето на меѓународните норми од страна на Америка, изјави рускиот министер за надворешни работи Сергеј Лавров.
– Со посетата на претседателката на Претставничкиот дом Ненси Пелоси на Тајван, Вашингтон се обидува да ја докаже својата неказнивост пред целиот свет – нагласи Лавров, додавајќи дека „САД прават што сакаат“.
Како што нагласи, не гледа друга причина да се создаде ваква провокација, практично од ведро небо, а добро е познато што значи Тајван за Народна Република Кина.
