Помошникот на генералниот секретар на Обединетите нации, Антонио Гутереш, Мирослав Јенча, на итна седница на Советот за безбедност на Обединетите нации во Њујорк изјави дека дипломатскиот замав кон можен мировен договор во војната во Украина „е во опасност брзо да избледи“, ако продолжат руските напади од големи размери.
Во обраќањето на седницата на СБ на ОН, која се одржа вчера попладне по локално време, откако Русија во текот на ноќта на 28 август изврши напади врз украинските градови во кои загинаа најмалку 25 лица, Јенча рече дека растечкиот број на жртви во Украина е во спротивност со неодамнешните напори да ѝ се даде шанса на дипломатијата, соопштено е на интернет-страницата на ОН.
Тој потсети дека Русија, според украинските функционери, лансирала 598 дронови и 31 ракета против Украина во текот на ноќта меѓу 27 и 28 август, а во нападот исто така тешко се оштетени и дипломатските простории на делегацијата на Европската Унија во Киев и зградата на Британскиот совет.
САД на седницата на СБ на ОН ја предупредија Русија да преземе чекори кон мир
САД на состанок на Советот за безбедност на Обединетите нации ја предупредија Русија да преземе чекори што ќе водат кон мир и да се состане со претставниците на Украина, или ќе се соочи со можни санкции, јави денеска „Гардијан“.
На итниот состанок на Советот за безбедност на ОН, кој беше свикан вчера откако во ракетните напади на Киев во текот на ноќта во четвртокот, 28 август, загинаа најмалку 25 лица, американскиот дипломат Џон Кели рече дека нападите „фрлаат сомнеж врз сериозноста на руската желба за мир“ и побара „нападите врз цивилни подрачја веднаш да престанат“.
Тој рече дека рускиот и украинскиот претседател, Владимир Путин и Володимир Зеленски, мора да се согласат на состанок и го повтори предупредувањето на американскиот претседател Доналд Трамп дека Вашингтон би можел да воведе санкции кон Русија, ако војната во Украина продолжи.
