Продолжуваат трилатералните мировни преговори за украина во Абу Даби
Руски и украински претставници вчера пристигнаа на нова рунда од мировните преговори посредувани од САД во Обединетите Арапски Емирати (ОАЕ), со цел наоѓање решение со кое ќе се стави крај на речиси четиригодишната војна во Украина. Дводневните трилатерални разговори доаѓаат откако првата рунда состаноци се одржа во ОАЕ минатиот месец, означувајќи ги првите директни јавни преговори меѓу Москва и Киев за мировниот план предложен од администрацијата на американскиот претседател Доналд Трамп.
Иако администрацијата на Трамп, во текот на изминатата година, ги притискаше двете страни да најдат компромиси, надминувањето на несогласувањата во однос на клучните прашања не изгледа поблиску.
Кои се клучните точки во преговорите?
Главна точка останува прашањето на територијата во источна Украина, која ја контролира Русија. Безбедносните гаранции за Украина, исто така, беа пречка во досегашните разговори за прекин на конфликтот. Москва бара од Киев да ги повлече своите трупи од делови од Донбас како услов за каков било договор. Исто така, сака меѓународно признание за територијата што ја анектираше во источна Украина. Киев, пак, инсистира дека конфликтот треба да биде замрзнат по сегашната линија на фронтот и отфрла еднострано повлекување на силите. А украинскиот претседател Зеленски постојано бара од западните поддржувачи да ги зголемат испораките на оружје за Украина и да извршат дополнителен економски и политички притисок врз Кремљ.
Делегацијата на Украина ја предводи шефот на Советот за национална безбедност и одбрана, Рустем Умеров, додека Русија ќе ја претставува нејзиниот директор на военото разузнавање Игор Костјуков.
Специјалниот претставник на Кремљ, Кирил Дмитриев, присуствуваше на разговори во Флорида, САД, со американски претставници изминатиот викенд. Иако ниту една страна не објави детали за тоа што било дискутирано, американскиот специјален претставник Стив Виткоф рече дека тие биле „продуктивни и конструктивни“. Виткоф го предводеше американскиот тим за време на разговорите минатиот месец. Р.С.
Дипломатски куриозитет на преговорите во Абу Даби
Воена дипломатија отвора простор за мир?!
- Рускиот претседател за оваа рунда преговори ги заменил досегашните преговарачи, меѓу кои и Владимир Медински, со активни воени лица, што дополнително ја менува динамиката на дијалогот. Според извори запознаени со разговорите, токму оваа „воена дипломатија“ создава нов квалитет во преговорите. Наместо општи политички формулации и декларативни позиции, на маса се ставаат конкретни и мерливи теми: механизми за повлекување на силите, безбедносни гаранции, временски рокови и практични чекори за стабилизација на теренот
Најновата рунда преговори меѓу Украина и Русија во Абу Даби носи значајна промена, која би можела да означи пресвртница во напорите за решавање на конфликтот. И официјален Киев и Кремљ направија суштински чекор напред, заменувајќи ги класичните дипломатски тимови со високи професионални воени офицери – сигнал дека разговорите влегуваат во пооперативна и поконкретна фаза.
Од украинска страна, вклучувањето на началникот на военото разузнавање Кирило Буданов и пратеникот Давид Арахамија во преговарачкиот процес веќе донесе промена во начинот на комуникација, не само со Русија туку и со Соединетите Американски Држави. Паралелно со тоа, рускиот претседател Владимир Путин ги замени досегашните преговарачи, меѓу кои и Владимир Медински, со активни воени лица, што дополнително ја менува динамиката на дијалогот.
Според извори запознаени со разговорите, токму оваа „воена дипломатија“ создава нов квалитет во преговорите. Наместо општи политички формулации и декларативни позиции, на маса се ставаат конкретни и мерливи теми: механизми за повлекување на силите, безбедносни гаранции, временски рокови и практични чекори за стабилизација на теренот.
– Сега таму седат луѓе што директно ги разбираат теренот и последиците од секоја одлука. Тоа ја прави комуникацијата појасна и понасочена кон решение – вели извор запознаен со преговорите.
Оваа промена се толкува како знак дека двете страни, и покрај длабоките разлики, се подготвени да разговараат за реални сценарија за деескалација. Фактот што преговорите се фокусираат на технички и безбедносни аспекти, а не само на политички позиции, отвора простор за постепено градење доверба и за поставување темели за подолгорочен мир.
Иако патот до конечен договор останува сложен и неизвесен, новата структура на преговорите во Абу Даби внесува доза на умерен оптимизам. Со директно вклучување на оние што ја водат војната, се зголемува шансата таа конечно да биде и завршена — преку договор што ќе биде одржлив, јасен и применлив на терен. Р.С.
