Сите компании би биле погодени доколку пукне балонот со вештачката интелигенција, изјави за Би-би-си Њуз шефот на Алфабет – матичната компанија на Гугл.
Во ексклузивно интервју за Би-би-си Њуз, Сундар Пичаи рече дека иако растот на инвестициите во вештачката интелигенција (ВИ) бил „екстраординарен момент“, во сегашниот бум на ВИ има одредена „ирационалност“.
Ова доаѓа во време кога во Силициумската Долина и пошироко постојат стравувања од балон, бидејќи вредноста на компаниите за ВИ-технологии драматично порасна во последните месеци, а компаниите трошат огромни суми на оваа индустрија што брзо се развива.
На прашањето дали Гугл би бил имун на последиците од пукање на балонот со ВИ, Пичаи рече дека технолошкиот гигант би можел да го преброди тој потенцијален удар, но издаде и предупредување.
– Мислам дека ниедна компанија нема да биде имуна, вклучително и ние – рече тој.
Во опширното ексклузивно интервју во седиштето на Гугл во Калифорнија, тој се осврна и на потребите од енергија, на забавувањето на климатските цели, инвестициите во Обединетото кралство, точноста на неговите модели за ВИ и влијанието на револуцијата на ВИ врз работните места.
Интервјуто доаѓа во момент кога контролата врз состојбата на пазарот на ВИ никогаш не била поинтензивна.
Акциите на Алфабет се удвоија во вредност за седум месеци и достигнаа 3,5 трилиони долари (2,7 трилиони фунти), бидејќи пазарот станува сè поуверен во способноста на гигантот за пребарување да се одбрани од заканата од ОпенАИ (OpenAI), сопственикот на ЧетЏПТ (ChatGPT).
Посебен фокус е развојот на специјализирани супер-чипови за ВИ на Алфабет, кои се во конкуренција со оние на Нвидиа (Nvidia), чиј шеф е Џенсен Хуанг, а чија компанија неодамна прва во светот достигна вредност од 5 трилиони долари.
Како што расте вреднувањето, некои аналитичари изразуваат скептицизам околу сложената мрежа од договори вредни 1,4 трилиони долари околу ОпенАИ, која се очекува оваа година да има приходи помали од илјадити дел од планираните инвестиции.
Со коментари што наликуваат на оние на поранешниот претседател на Федералните резерви на САД, Алан Гринспен во 1996 година, кога предупреди за „ирационална еуфорија“ на пазарот за време на дотком-бумот – многу пред распрснувањето на тој пазар во 2000 година – Пичаи рече дека индустријата може да „претера“ во инвестициските циклуси како овој.
– Сега можеме да се вратиме наназад и да го погледнеме интернетот. Очигледно имаше многу прекумерни инвестиции, но никој од нас не би го доведувал во прашање фактот дека интернетот беше длабоко трансформативен. Очекувам ВИ да биде исто така. Затоа мислам дека е и рационално и дека има елементи на ирационалност во еден ваков момент – рече тој.
Неговите коментари доаѓаат по предупредувањето на Џејми Дајмон, шефот на американската банка Џеј-Пи Морган, кој минатиот месец за Би-би-си изјави дека инвестициите во ВИ ќе се исплатат, но дека дел од парите вложени во индустријата „најверојатно ќе бидат изгубени“.
Но, Пичаи рече дека уникатниот модел на Гугл – поседување на целосен „фул стак“ (full stack) технологии, од чипови до податоци од Јутјуб, модели и гранична наука – значи дека компанијата е во подобра позиција да ги преброди евентуалните турбуленции на пазарот на ВИ.
Технолошкиот гигант исто така го проширува своето присуство во Обединетото Кралство. Во септември, Алфабет објави дека инвестира во вештачката интелигенција во ОК, ветувајќи 5 милијарди фунти за инфраструктура и истражување во наредните две години.
Пичаи рече дека Алфабет ќе развива „најсовремени“ истражувачки работи во ОК, вклучително и во клучната единица за ВИ, ДипМајнд (DeepMind), со седиште во Лондон.
По првпат изјави дека Гугл „со текот на времето“ ќе го направи чекорот за кој инсистира владата – „да ги тренира нашите модели“ во Обединетото Кралство, потег за кој министрите во кабинетот веруваат дека би ја зацврстил државата како трета „суперсила“ за ВИ по САД и Кина.
– Посветени сме на значително инвестирање во ОК – рече Пичаи.
Сепак, тој предупреди и за „огромните“ енергетски потреби на ВИ, која минатата година сочинуваше 1,5 проценти од светската потрошувачка на електрична енергија, според Меѓународната агенција за енергија.
Пичаи рече дека е потребно дејствување, вклучително и во ОК, за развој на нови извори на енергија и зголемување на енергетската инфраструктура.
– Не сакате да ја ограничувате економијата врз основа на енергија, и мислам дека тоа ќе има последици – рече тој.
Тој исто така призна дека интензивните енергетски потреби на проширувањето на нивниот потфат со ВИ значат флексибилност во остварувањето на климатските цели на компанијата, но инсистира дека Алфабет сè уште има цел да постигне нето-нула емисии до 2030 година преку инвестирање во нови енергетски технологии.
– Темпото со кое се надевавме дека ќе напредуваме ќе биде засегнато – рече тој.
ВИ ќе влијае и на работата каква што ја познаваме, рече Пичаи, нарекувајќи ја „најдлабоката технологија“ на која човештвото досега работело.
– Ќе мораме да работиме низ општествените нарушувања – рече тој, додавајќи дека ќе создаде и „нови можности“.
Според него, таа ќе еволуира и ќе трансформира одредени работни места, а луѓето ќе мора да се прилагодат. Оние кои ќе се прилагодат на ВИ „ќе бидат подобри“.
– Не е важно дали сакате да бидете учител или лекар. Сите тие професии ќе постојат, но луѓето кои ќе напредуваат во секоја од тие професии ќе бидат оние кои ќе научат како да ги користат овие алатки – рече тој.
