Силно невреме попладнево го зафати Букурешт, предизвикувајќи поплави, сообраќаен хаос и проблеми со воздушниот сообраќај. Поројниот дожд траеше повеќе од еден час, поплави десетици улици и ги забави и возилата и пешаците.
Вода навлезе и во неколку станбени и деловни објекти, а изненадените граѓани и туристи објавија бројни видеа на социјалните мрежи.
Според властите, ветерот дуваше со брзина до 70 км/час и собори многу дрвја, често врз автомобили.
Поради лошото време, неколку летови од Букурешт полетаа со доцнење, а авионите од Париз, Штутгарт и Клуж-Напока не можеа да слетаат на меѓународниот аеродром „Хенри Коанда“ (Отопени), па беа пренасочени кон Констанца и Крајова, соопштија аеродромските власти за БТА.
– Високата влажност и температурите над просекот придонесуваат за вакви појави, особено бидејќи јуни е највлажниот месец во годината во Романија – изјави за Диџи24 директорката на Националната метеоролошка служба, Елена Матееску. Таа најави дека следуваат периоди на нестабилност и високи температури до 35 степени.
