Советникот на украинскиот претседател, Игор Жовква, изрази разочарување од Алијансата
Украинските власти чувствуваат огорченост во однос на НАТО додека воената алијанса се собира на самитот во Мадрид, пишува „Блумберг“.
– На Украина ѝ е кажано, вие не сте членка бидејќи не ве сакаме. НАТО ни кажува, не ви даваме ништо – изјави советникот на украинскиот претседател Владимир Зеленски, Игор Жовква, кој е одговорен за надворешната политика.
Членките на Алијансата ѝ испратија на Украина големи пратки на оружје за да и помогнат во војната со Русија. Снабдувањето постепено ги вклучува и офанзивните оружја, со што САД ветија испраќање и на модерен ракетен систем земја-воздух. Германскиот секретар Олаф Шолц денеска порача дека НАТО ќе испраќа оружје во Украина сè додека тоа е потребно, односно сè додека Украина треба да се брани. Но алијансата во целина потфрлила, според Жовква, при што очекувањата на Украина од самитот во Мадрид се ниски.
– Очигледно е дека сакаме да постигнеме едногласна звучна поддршка за Украина – истакна Жовква, кој ќе учествува на самитот на НАТО, каде што преку видеоповик ќе се обрати и украинскиот претседател Владимир Зеленски.
Жовква нагласува и дека владата во Киев побарала оружје од НАТО и пред војната, воведување на зона на забранети летови по почетокот на оружените судири, како и перспектива за членство, но не добила никаков одговор. „Блумберг“ посочува оти повеќе членки на НАТО, вкучувајќи ги и САД, стравуваат дека воведувањето на зона на забранети летови над Украина би можело да предизвика директен судир помеѓу нуклеарните сили, а понудата за членство во НАТО исто така би можела да доведе до ескалација на војната.
– Новиот предлог за безбедносниот концепт на Алијансата треба да прифати јасно оти Русија е примарната закана и дека најдобрата одбрана против таа закана е Украина – порача Жовква.
