Нобеловата награда за хемија оваа година им е доделена на Мунги Бавенди, Луис Брус и Алексеј Екимов за нивната работа на мали квантни точки, наночестички толку ситни што нивната големина ги одредува нивните својства, пренесе „Танјуг“.
Доделувањето на Нобеловата награда за хемија го објави Ханс Елегрен, генерален секретар на Кралската шведска академија на науките, пренесе „Ројтерс“.
Квантните честички имаат уникатни својства и ја шират својата светлина во секојдневните уреди што ги користиме, на пр. од телевизиски екрани и од ЛЕД светилки.
– Тие катализираат хемиски реакции и нивната чиста светлина може да го осветли туморското ткиво во хируршката дијагностика. Истражувачите првенствено користеле квантни точки за да создадат обоена светлина. Тие веруваат дека во иднина, квантните точки можат да придонесат за развој на флексибилна електроника, минијатурни сензори, потенки соларни ќелии и можеби шифрирана квантна комуникација – се вели во објавата на Нобеловиот комитет на платформата X (Твитер).
Нобеловите награди носат парична награда од 11 милиони шведски круни (еден милион долари), а парите се доделуваат од фондот на креаторот на наградата, шведскиот пронаоѓач Алфред Нобел, кој почина во 1896 година.
