Германскиот канцелар Фридрих Мерц денеска повика на континуиран ангажман на САД во решавањето на војната во Украина, изразувајќи надеж дека американскиот претседател Доналд Трамп ќе има исто влијание како што има на Блискиот Исток.
Зборувајќи пред самитот со американскиот претседател и други светски лидери за зацврстување на прекинот на огнот во Газа, Мерц рече дека состанокот во Египет покажал дека завршувањето на војната е можно ако меѓународната заедница остане обединета.
Американскиот претседател Доналд Трамп и египетскиот лидер Абдел Фатах ал-Сиси ќе претседаваат со мировниот самит за Газа во Шарм ел-Шеик, Египет, денеска, на кој ќе присуствуваат лидери од повеќе од 20 земји и меѓународни организации.
Египетското претседателство соопшти дека самитот ќе има за цел да ја заврши војната во Појасот Газа, да ги зајакне напорите за постигнување мир и стабилност на Блискиот Исток и да воведе нова ера на регионална безбедност, објави „Гардијан“.
Самитот беше организиран откако Израел и Хамас се согласија на прекин на огнот и размена на затвореници за ослободување на заложниците, и по интензивните индиректни преговори во Шарм ел-Шеик во текот на изминатите неколку дена, објави весникот.
Преговорите, со посредство на Египет, Катар и Турција, во кои учествуваа американскиот претставник Стив Виткоф и зетот на американскиот претседател Џаред Кушнер, резултираа со договор за прекин на огнот и зголемена хуманитарна помош за Газа.
