Брисел – Европската Унија и Британија, според дипломатски извори, до крајот на неделава би можело да објават дека постигнале трговски договор по брегзит. Правилата за фер конкуренција и риболовните права беа главни пречки за склучување трговски договор за време на деветмесечните напорни разговори за трговските односи. Извори од Британија и од ЕУ изјавија дека преговорите се во крајна фаза бидејќи преговарачите работеле прекуноќ во Брисел на деталите за нацрт-договорот што се протега на околу 2.000 страници. Британскиот премиер Борис Џонсон го информира кабинетот за разговорите.
Букурешт – Романскиот парламент избра проевропска централно-десничарска влада предводена од економистот Флорин Циту од Националната либерална партија. Оваа партија на поранешниот премиер Лудовик Орбан ќе биде главната партија во Владата, додека Социјалдемократската партија, која освои најмногу гласови на изборите на 6 декември, ќе остане во опозиција. За избор на Владата гласаа 260 од 465 пратеници, додека 186 беа против.
Кишињев – Избраната претседателка на Молдавија, Маја Санду, ја презеде функцијата од Игор Додон. Премиерот на Молдавија, Санду, кој е за поблиски врски со Европската Унија, треба да номинира мандатар за премиер. Завчера молдавската влада поднесе оставка. Таа беше главно составена од министри што му се лојални на Додон, кој, пак, ја има поддршката од Кремљ и кој се очекува да ја посети Москва деновиве.
Вашингтон – Претседателот на САД во заминување, Доналд Трамп, издаде нови 26 помилувања, вклучувајќи ги и поранешниот претседател на неговиот изборен штаб Пол Манафорт, републиканскиот оперативец Роџер Стоун и Чарлс Кушнер, таткото на зетот на претседателот и советник Џеред Кушнер. Новата претседателска милост дојде ден откако Трамп претходно издаде помилување за 15 лица, вклучувајќи и две лица осудени за измама на истражители во истрагата во Русија и двајца поранешни републикански конгресмени.
