Не е лесно да се постигне договор со САД за ставање крај на војната во Украина, изјави рускиот министер за надворешни работи Сергеј Лавров.
-Не е лесно да се договорат клучните компоненти за решавање на конфликтот, нагласи Лавров. „За нив се разговара“ – увери тој.
Тој оваа изјава ја даде како одговор на прашање во интервју за руски весник.
Лавров, сепак, ја пофали администрацијата на Трамп, велејќи дека се обидува да дојде до „основните причини“ на конфликтот, се вели во интервјуто.
-Целосно сме свесни како изгледа зделка со заемна корист, која никогаш не сме ја отфрлиле и како изгледа договор што би можел да не одведе во друга замка – нагласи рускиот министер за надворешни работи во интервјуто.
Во неделата Кремљ соопшти дека е премногу рано да се очекуваат резултати од нормализацијата на односите со Вашингтон.
Лавров рече дека позицијата на Русија беше јасно изразена од претседателот Владимир Путин во јуни минатата година, кога побара од Украина формално да се откаже од своите амбиции да се приклучи на НАТО и да ги повлече своите трупи од целата територија на четирите украински региони кои Русија ги бара.
-Зборуваме за правата на луѓето кои живеат на овие земји. Затоа овие земји ни се драги. И не можеме да се откажеме од нив, дозволувајќи луѓето да бидат протерани од таму – рече Лавров.
Русија моментално контролира нешто помалку од една петтина од територијата на Украина, вклучувајќи го и полуостровот Крим, чија анексија беше објавена во 2014 година, и делови од четири други региони за кои Москва сега тврди дека се дел од Русија – барање што не го признаваат повеќето земји.
Лавров го пофали „здравиот разум“ на Трамп и изјави дека претходната американска поддршка за обидот на Украина да се приклучи на НАТО е главната причина за војната во Украина.
Но, руската политичка елита, рече тој, нема да дозволи никакви чекори кои би ја доведоа Русија да се врати на економска, воена, технолошка или земјоделска зависност од Западот. Според Лавров, глобализацијата на светската економија е уништена со санкциите воведени кон Русија, Кина и Иран од страна на администрацијата на поранешниот американски претседател Џо Бајден.
