Односите меѓу двете земји се развиваат динамично, и покрај многу тешката ситуација во регионот и во светот, и покрај обидите да се изврши притисок за да се ограничи развојот и на Иран и на Руската Федерација, изјави рускиот министер за надворешни работи Сергеј Лавров на прес-конференција по средбата со неговиот ирански колега Абас Арагчи.
Една од темите за кои разговараа беше спротивставувањето на едностраните незаконски санкции.
– Тие создаваат проблеми не само за земјите против кои се применуваат, туку создаваат уште поголеми проблеми за земјите против кои се воведуваат овие ограничувања и за меѓународната трговија, бидејќи остро ја ограничуваат слободата на конкуренцијата – истакна Лавров.
Тој додаде дека се договориле да продолжи соработката со цел да се минимизира и да се намали ефектот од овие санкции на нула, како во рамките на меѓународните платформи, така и на билатерално ниво.
Според него, тие се целосно уверени дека ќе успеат.
Тој додаде дека на 8 април Државната Дума го ратификувала Договорот за сеопфатно стратешко партнерство со Иран, а на 16 април Советот на Федерацијата го усвоил законот за ратификација.
– Уверени сме дека стапувањето во сила на овој историски документ ќе има најпозитивно влијание врз нашата соработка во сите области – нагласи тој.
Трговијата меѓу двете земји се зголемува и покрај острите санкции што Западот ги воведе кон Русија и Иран.
– Сметам дека преговорите беа корисни, навремени и ќе продолжиме да ги спроведуваме принципиелните договори на нашите претседатели – рече Лавров, додавајќи дека ќе остане во постојан контакт со својот ирански колега.
Арагчи потоа нагласи дека односите меѓу Русија и Иран никогаш не достигнале толку високо ниво.
Тие се осврнаа и на претстојните преговори меѓу Иран и САД, кои ќе се одржат утре. Иран, според Арагчи, ќе учествува во разговорите со целосна волја и сериозност со цел да се бара решение за мирољубивата нуклеарна програма на Иран. Тој исто така изјави дека иранската страна се сомнева во искреноста на намерите на САД.
– Нереалните барања само ќе ја намалат можноста за постигнување договор – рече Арагчи.
Сепак, додаде тој, доколку нема нереални барања, постигнувањето договор е сосема можно.
Лавров потоа нагласи дека Русија е подготвена да помогне и да посредува во овие преговори, во интерес на двете земји, но исклучиво во рамките на нуклеарното прашање, без непотребни теми.
Русија смета дека се ризични обидите американско-иранските разговори да се „оптоварат“ со прашања кои не се поврзани со нуклеарната програма.
