Глобалната ситуација со колерата продолжува да се влошува поради конфликтите и сиромаштијата, што претставува значаен предизвик за јавното здравје во неколку региони, објави денеска Светската здравствена организација (СЗО).
Помеѓу 1 јануари и 17 август оваа година, низ целиот свет се пријавени 409.222 случаи на колера и 4.738 смртни случаи, при што шест од 31 земји пријавиле стапка на смртност над еден процент, што укажува на сериозни недостатоци во управувањето со случаите и одложен пристап до здравствена заштита, се наведува во соопштението на СЗО.
Во истиот период во 2024 година, 28 земји пријавиле 510.638 случаи и 3.248 смртни случаи, што претставува намалување од 20 проценти во бројот на случаи, но зголемување од дури 46 проценти во бројот на смртни случаи.
Во 2025 година, најголем број случаи на колера, 230.991, се регистрирани во регионот на Источниот Медитеран, по што следуваат африканскиот регион со 172.750, регионот на Југоисточна Азија со 2.985 случаи и регионот на Америка со 2.496 случаи.
Бројот на смртни случаи поврзани со колера беше најголем во Африканскиот регион – 3.763, по што следуваат регионот на Источниот Медитеран со 943, регионот на Америка со 31 и регионот на Југоисточна Азија со еден смртен случај.
Европските и западнопацифичките региони не пријавиле случаи на колера.
