Кина и Европската Унија се партнери, а не ривали, изјави кинескиот министер за надворешни работи Ванг Ји во телефонски разговор со Емануел Бон, дипломатскиот советник на францускиот претседател Емануел Макрон.
– Пекинг и Брисел се придржуваат до исти или слични позиции за прашања како што е поддршката на принципот на мултиполарност и се способни да ги решаваат трговските спорови преку дијалог – нагласи уште Ванг Ји.
Тој исто така забележа дека на почетокот на новата година меѓународната ситуација претрпела значителни промени, при што нестабилноста и немирите се во пораст. Како големи држави кои се стремат кон независност и автономија,
– Кина и Франција треба да ја засилат својата комуникација и координација, заедно да ја внесат толку потребната стабилност во светот и подобро да ја искористат стратешката вредност на кинеско-француските односи – истакна кинескиот министер за надворешни работи, цитиран од весникот „Глобал Тајмс“.
Ванг повтори дека Кина и ЕУ се партнери, а не ривали, факт докажан со повеќе од 50 години плодна соработка.
– Во сегашните околности, Кина и ЕУ треба да го засилат дијалогот, да изградат меѓусебна доверба и да ја продлабочат соработката. Неодамнешните посети на Кина од страна на лидерите на неколку европски земји значително ги поттикнаа односите меѓу Кина и ЕУ. Кина се надева дека Франција ќе продолжи да игра позитивна улога во рамките на ЕУ и ќе помогне во напредокот на здравиот и стабилен развој на односите меѓу Кина и ЕУ – изјави Ванг Ји.
