Почнувајќи од март, градската власт во еден јапонски град ќе ги проверува кесите за ѓубре што ги прекршуваат прописите, како што се оние што не се правилно сортирани или се потешки отколку што треба, а во некои случаи јавно ќе ги идентификува нивните сопственици. За неупатените, сортирањето ѓубре може да биде комплициран процес во Јапонија – земја која може да се пофали со едно од најстрогите правила за фрлање ѓубре во светот.
Меѓутоа, во градот Фукушима работите ќе станат уште потешки. Почнувајќи од март, градската влада ќе ги проверува кесите за отпадоци што ги прекршуваат прописите – како што се оние што не се правилно сортирани или се потешки отколку што треба – и во некои случаи јавно ќе ги идентификуваат нивните сопственици. Новите прописи, усвоени на општинскиот состанок во вторникот, на 17 декември, доаѓаат во време кога Јапонија сака да го подобри својот систем за управување со отпад.
Додека многу градови во Јапонија отвораат вреќи за ѓубре за проверка, се верува дека Фукушима е првиот град кој планира да ги открие имињата на поединци и бизниси кои не го селектираат отпадот според правилата, јавуваат локалните медиуми. Минатата година Фукушима пријави над девет илјади случаи на несоодветно одвоено ѓубре.
Во моментов, наместо да го собираат ѓубрето што не е во согласност со правилата за одлагање, работниците обично лепат налепници на кесите за ѓубре за да ги известат жителите за прекршувањето. Жителите потоа треба да го однесат ѓубрето, повторно да го сортираат и да се надеваат дека ќе го сработат до следниот пат кога ќе дојдат собирачите.
Според новите правила на Фукушима, ако ѓубрето остане несортирано една недела, градските работници можат да поминат низ него и да се обидат да ги идентификуваат прекршителите преку пратки, како што е поштата. На прекршителите ќе им биде дадено усно предупредување, а потоа и писмено, пред конечната казна – нивните имиња да бидат објавени на веб-страницата на Владата. Поради загриженоста за приватноста, властите на Фукушима соопштија дека проверката на ѓубрето ќе биде направена приватно.
Јапонските градови имаат свои упатства за отстранување на ѓубрето. Во Фукушима секое утро до 08:30 часот мора да се ставаат вреќи со ѓубре на собирните места.
Различни видови ѓубре – поделени на запаливи, незапаливи и рециклирачки – се собираат според различни распореди. За предметите што ги надминуваат пропишаните димензии, како што се апарати за домаќинство и мебел, станарите мора да закажат термин за посебно подигање.
Градоначалникот на Фукушима, Хироши Кохата, рече дека новите правила промовираат намалување на отпадот и правилни методи за отстранување.
„Нема ништо незаконски во објавувањето на производителите на отпад кои не ги почитуваат правилата и не ги следат упатствата и советите на градот“, велат надлежните.
Отпадоците се сфаќаат многу сериозно во Јапонија, каде што од 1990-тите владата ја постави како национална цел да ги намали депониите и отпадот и да го промовира рециклирањето.
