Словенија во текот на своето претседавање со Советот на ЕУ се избори во документите повторно да се воведе поимот „перспектива за членство“, наместо само „европска перспектива“ за државите на Балканот и европското источно соседство, тврди словенечкиот премиер Јанез Јанша, а пренесува хрватски „Индекс“.
– Еден од стратегиските успеси е што проширувањето го вративме на маса како еден од клучните проекти на ЕУ. Но за тоа беа потребни многу расправи. Во тие расправи многу пати кажав дека по сè што доживуваме на истокот и што во последните децении го гледавме на Балканот треба да биде јасно дека ЕУ мора да се шири, со што се шири просторот на слободата и благосостојбата. Треба да се ослободиме од илузијата дека нештата ќе се решаваат сами по себе, а ако не се шири ЕУ, ќе се шири некој друг – изјави Јанша за словенечката телевизија, зборувајќи за успесите на својата влада, во традиционалното предновогодишно интервју.
Јанша изјавил дека „еден од европските лидери во расправата дури кажа: зошто би ги внеле во Европската Унија, кога вака ни се поевтини како работна сила?“,
– Во некои постари членки преовладуваат тесноградоста и националистичките интереси над визијата на слободна, мирна и обединета Европа – истакна Јанша.
