Медиумите на хебрејски јазик, повикувајќи се на неименувани израелски претставници, јавија дека Ерусалим добил индикации дека Хамас сака да го забрза ослободувањето на заложниците во Газа за вечерва, јави Тајмс оф Израел, пренесува МИА.
Според извештаите, милитантната исламистичка група дала сигнал дека сака процесот да биде завршен пред утрешното пристигнување на американскиот претседател Доналд Трамп во Израел.
Нема официјална потврда за можниот забрзан распоред. Израелските претставници претходно изјавија дека очекуваат заложниците да бидат ослободени утре изутрина.
„Вол Стрит Џурнал“, повикувајќи се на извори запознаени со прашањето, претходно јави дека Хамас му потврдил на Израел дека 20 заложници се живи и оти можат да бидат ослободени уште денеска.
Според извештајот, пораката била испратена преку арапски посредници.
Израелски функционер за весникот изјавил дека Израел е подготвен да ги прими заложниците вечерва, иако се уште се смета дека понеделник ќе биде посоодветен за нивно ослободување.
Израел исто така соопшти дека верува дека 20 заложници се живи, постојат сериозни загрижености за судбината на уште двајца, додека за 26 други е потврдено дека се починати.
