Западот го зголеми военото присуство на Балтикот и во северните мориња како одговор на сомневањата за руска саботажа на подводните гасоводи, додека од НАТО испратија предупредувања до Москва против целење на критичната инфраструктура во Европа, што е најнов знак за зголемените тензии помеѓу Западот и Русија поради војната во Украина, пишува „Форин полиси“.
Земјите-членки на НАТО го удвоија поморското присуство во Балтикот и северните мориња на преку 30 бродови, според високи функционери на Алијансата, откако го обвинија Кремљ за саботажа на гасоводот „Северен тек“. Сојузниците од НАТО го проширија и подводниот и воздушниот надзор на Балтикот и северните мориња со подморнички патроли и летови, според изворите на американскиот магазин.
Се очекува тежата на силите во регионот на Балтичкото Море да се помести во корист на НАТО кога Финска и Шведска формално ќе влезат во Алијансата. Тие ја истакнаа кандидатурата за влез во НАТО во февруари, по што Алијансата почна Балтичкото Море да го нарекува „НАТО езеро“.
– Последните случувања покажуваат дека НАТО треба да го одржи, дури и зголеми поморското присуство во Северното Море и во Балтичкото Море. Ова сега се оспорувани води. Русија јасно покажа дека нема да ја собере балтичката флота и да замине дома – вели Стив Хорел, поранешниот американски морнарички разузнавач и експерт за обранбени прашања во Центарот за анализа на европската политика.
Подводната саботажа на „Северен тек“ би морала да го фати НАТО на спиење
