Принципиелното одобрување на Иран за договорот за прекин на огнот во Газа не смее да се толкува како поддршка за политиката на американскиот претседател Доналд Трамп за Блискиот Исток, изјави денеска иранскиот министер за надворешни работи, Абас Арагчи.
– Г-дин Трамп ги изразува своите претпочитани позиции во различни формати, но тие најмногу се во контрадикција со нашите идеолошки убедувања – рече Арагчи на државната телевизија.
Тој нагласи дека поддршката на Иран за мировната иницијатива служи само за целта за ставање крај на насилството, но рече дека не е на повидок реална перспектива за мир за палестинските територии.
– Постои фундаментална разлика меѓу моменталната ситуација и многу нејасните изгледи за иднината – рече Арагчи.
Тој додаде дека особено Израел постојано не успевал да се придржува до таквите договори.
Поддршката за милитантните групи како Хамас и создавањето на независна палестинска држава се централни елементи на доктрината за надворешна политика на Иран. Од Исламската револуција во 1979 година, Техеран не го признава Израел како држава и избегнува да го спомене по име. Наместо тоа, секогаш го ословува како „ционистичкиот режим“.
