Членот на Политичкото биро на Централниот комитет на Комунистичката партија на Кина и министер за надворешни работи на Народна Република Кина, Н.Е. г. Ванг Ји, и заменик-претседателот на Владата и министер за надворешни работи на Исламската Република Пакистан, сенаторот Мохамад Ишак Дар, остварија состанок во Пекинг на 31 март 2026 година, за да ја разгледаат состојбата во регионот на Заливот и Блискиот Исток.
Двете страни го предложија следново:
I. Итно прекинување на непријателствата
Кина и Пакистан повикуваат на итно прекинување на непријателствата и вложување максимални напори да се спречи понатамошно ширење на конфликтот. Мора да се овозможи непречен пристап на хуманитарна помош до сите области погодени од конфликтот.
II. Итно започнување мировни преговори
Суверенитетот, територијалниот интегритет, националната независност и безбедноста на Иран и земјите од Заливот треба да бидат почитувани и заштитени. Дијалогот и дипломатијата претставуваат единствена одржлива опција за решавање на конфликтите. Кина и Пакистан ги поддржуваат засегнатите страни во започнување разговори, при што сите страни треба да се обврзат на мирно решавање на споровите и да се воздржат од употреба на сила или закана за време на мировните преговори.
III. Заштита на цивили и невоени објекти
Треба строго да се почитува принципот на заштита на цивилите во оружени конфликти. Кина и Пакистан ги повикуваат страните веднаш да престанат со напади врз цивили и невоени цели и целосно да се придржуваат кон меѓународното хуманитарно право. Потребно е да се прекинат нападите врз клучната инфраструктура, меѓу кои и енергетски, десалинизациски и електроенергетски објекти, како и врз нуклеарната инфраструктура за мирнодопски цели, вклучувајќи и нуклеарни централи.
IV. Безбедност на поморските линии
Ормускиот Теснец, заедно со неговите соседни води претставува витална глобална поморска рута за транспорт на стоки и енергија. Кина и Пакистан ги повикуваат страните да ја гарантираат безбедноста на бродовите и нивните екипажи во теснецот, да овозможат безбедно и непречено поминување на цивилните и комерцијалните бродови што е можно поскоро и да го обноват нормалниот сообраќај низ теснецот во најкус можен рок.
V. Приматот на Повелбата на Обединетите нации
Кина и Пакистан повикуваат на практикување вистински мултилатерализам, заедничко зајакнување на водечката улога на Обединетите нации и поддршка на постигнување договор за воспоставување сеопфатна мировна рамка, со цел обезбедување траен мир врз основа на целите и принципите на Повелбата на ОН и меѓународното право.
