Јеменските Хути собориле американски дрон MQ-9, вреден 30 милиони долари. Портпаролот на движењето, Јахја Саре, изјави дека Хутите успеале да го соборат беспилотното летало со помош на противвоздушна одбрана, во моментите кога дронот вршел активности во покраината Мариб.
– Ова е осмиот дрон од овој тип што успеавме да го собориме за време на битката „Свети џихад“, како поддршка за Појасот Газа и палестинскиот народ. Овие должности се извршуваат со помош на Бога, со цел зајакнување на одбранбените способности против американско-британската агресија – изјави портпаролот.
Собореното летало чини 30 милиони долари и може да лета на висина до 15.240 метри, со капацитет да остане во воздух полни 24 часа.
Овој напад го коментираше и американската војска, која соопшти дека е запознаена со тврдењата, но досега не примила никакви извештаи за соборување на американски дронови над територијата на Јемен.
